रोहनको खुशी

कथा

मनोज अधिकारी

रोहन आफ्नो आमाबुवासँग सानो गाउँमा बस्थ्यो । उसका बुबा, राजेश एक मेहनती व्यक्ति थिए जो साधारण काम गरेर आफ्नो परिवार पाल्थे ।

रोहनकी आमा राधा दयालु महिला थिइन् । उनी रोहनको रेखदेख र घरको हेरचाह गर्थिन् । उनीहरुको सरल तर खुसी जीवन चलिरहेको थियो ।

तर, एक दिन राजेश र राधालाई आफूले नगरेको अपराधको झूटो आरोप लाग्यो । जसले उनीहरुको संसार नै उल्टो हुन पुग्यो । राजेश र राधा पक्राउ परे र जेलमा थुनिए । रोहन एक्लै पर्याे । ऊ निकै दुःखी भो । उसको बुबा र आमाबाहेक अरु कोही थिएन । त्यसैले उसको कतै जाने ठाउँ भएन ।

कुनै उपाय नलागेपछि ऊ जेल बाहिरको पेटीमा बुबा र आमालाई कुरेर बस्न थाल्यो । आफ्ना मायालु बाबुआमा बीना गल्ती किन जेल परे भनेर उसले बुझ्न सकेन । त्यो बालकको दयालाग्दो अवस्था देखेर एकजना दयालु महिलाले रोहनलाई आफुसँगै राखिन ।

जेल नजिकैको घरमा बसे पनि रोहनको मन हरक्षण जेलमा रहेका आमाबाबुसँगै हुन्थ्यो र उनीहरूसँगको पुनर्मिलन पर्खिरहन्थ्यो । रोहनका आमाबाबु बाहिर छोरो एक्लै रोइरहेको सम्झेर निकै दुःखी भए ।

माया नामकी ती महिलाको आफ्ना सन्तान थिएनन् । उनी रोहनलाई नै सन्तान ठानेर पाल्न चाहन्थिन् । त्यसैले उनले रोहनको राम्रो हेरचाह गरिन् । मिठो खाना र राम्रो कपडा दिइन् । आरामदायी ओछ्यानमा सुताइन् । उनले सुविधाका सबै कुरा उपलब्ध गराइदिइन् जुन रोहनले आफ्नो घरमा कहिल्यै पाएको थिएन । तर पनि रोहन खुशी हुन सकेन ।

आफ्नो आमाबाबु नहुँदा एक्लोपनले निराश भएर ऊ सधैं रोइरह्यो । ऊ जतिखेर पनि झ्यालमा बस्थ्यो र पारीपट्टीको जेलतिर हेरिरहन्थ्यो ।

दिनहरू बित्दै गए । रोहनले थाहा पायो उसका आमाबाबुको मुद्दाको समीक्षा भइरहेको छ, जुन उनीहरू जेलमुक्त हुने मौका हुन सक्छ । उसले भगवानसँग आमाबुबाका लागि दैनिक प्रार्थना गरिरह्यो ।

अन्ततः, महिनौंको पर्खाइपछि रोहनको प्रार्थनाको जवाफ आयो । उसका आमाबुबा निर्दोष सावित भए र जेलबाट छुटे । रोहन एकदमै खुसी भयो र आमाबुबालाई भेट्न दौडियो ।

एउटा निर्दाेष परिवारले अनावश्यक शंकाको भरमा केही समय दुःख पायो । तैपनि उनीहरु अदालतप्रति धन्य भए र आफुहरुको पुनःर्मिलनमा खुशी भए ।

रोहनका आमाबाबुले उसले भोग्नुपरेको दुःखको लागि माफी मागे । रोहन अब फेरि आफुलाई कहिल्यै एक्लो नछोड्ने वाचा गराएर आमाबाबुको काखमा बस्यो ।

आमाबाबुले रोहनलाई आफुसँगै राखेर हेरचाह गर्ने मायालाई धेरै धन्यवाद दिए । रोहनको परिवार फेरि सँगै हुँदाको खुशी देखेर माया खुशी भइन् ।

रोहन, उसका आमाबाबु र मायालाई यो अनुभवले के सिकायो भने परिवार नै जीवनमा सबैभन्दा महत्वपूर्ण कुरा रहेछ । र परिवार एकै ठाउँमा हुँदाको जस्तो खुशी अन्य सुख र सुविधाले दिन सक्दो रहेनछ ।

समाप्त

लेखेको र प्रकाशित मिति : अप्रिल 6, 2023